Umubiri ubyara udahatse. Uyu musore yitwa Gihozo Kwibuka Jean de Dieu, afite imyaka 20. Avuka i Nyagatare mu murenge wa Karangazi. Ni imfura mu bana 5, papa wabo amaze amezi 6 apfuye, basigaranye mama wabo utunzwe no guca inshuro.
Uyu musore mu buzima bwe nta ndwara yigeze arwara uretse ibicurane, gusa umwaka ushize amaze amezi 2 asoje segonderi, ku ijosi haje ho agaheri, ajya kwa muganga bati ufite infegisiyo mu maraso, bamwohereza i Kanombe ngo avurwe, baramubaga basanga ni enfegisiyo nabo, gusa ubushobozi buza kubura asubira mu rugo, ni uko agenda abyimbirwa kurushaho.
Byakomeje kwiyongera, asubirayo bamwohereza ku bitaro bya Nyarugenge, nabo bamwohereza CHUK, CHUK basanga arwaye kanseri, bahita bamwohereza kuri Faycal. Bamuciye miliyoni 4 n’ibihumbi magana inani arayabura, asubira kurwaria mu rugo. Byakomeje gukomera, asubira i Kanombe bamwohereza i Butaro kuko ariho bavurira kuri mituweli. Igihe bamuhaye cyo kujyayo cyarageze, gusa nta mafaranga afite, yewen a tike yarabuze. Bigenda bikomera, ubu ntareba neza, asigaye yitura hasi kenshi ku munsi kuko agira isereri iturutse ku misonga, ijosi rikomeza kubyimba kubera ibibyimba.
Ubu ntiyabasha guhindukira, kuryama ntibikunda kuko yumva ubwonko bumeze nk’uburi kwicunda, bituma arara yicaye uretse ko n’imisonga idatuma asinzira, yewe n’imiti igabanya uburibwe ntigikora. Kanseri iri kwihuta, biri kugenda bimanuka bijya no ku ntugu. Ari gushaka ubufasha nibura ngo arebe ko yakwivuza, kuko amatungo yari afite yose n’ibindi by’umuryango byaragurishijwe, ngo barebe ko bamuvuza, kandi n’I Butaro ntibizabura kugera muri miliyoni 2.
Mama we ahora arira, kuko papa we yarigendeye basi yakamufashije, niwe umujyana kwa muganga agasiga abandi bana 4 bato kandi bakeneye ikibatunga no kwiga, akabura uko abacira incuro. Gufasha uyu musore kwivuza kanseri (Nimero: +250 796 498 190, amazina ni Gihozo Kwibuka Jean de Dieu).
